الاخوان مش همه الحل

هو حوار دار بيني وبين حد مختلف معايا في الرأي وده عادي اننا نختلف لكن اللي مش عادي اننا نستفز بعض عشان نتعصب علي بعض من حقك انك تبقي منحاز لرأيك لكن من حقي أعارضك مش أجرحك ولا أحاربك المفروض لو احنا معارضه بنتفق في هدف محاربة الحكومه الفاسده والفساد لكن لما نبقي معارضه ونحارب في بعض أكيد هنموت بعض وهتفضل الحكومه الفاسده وهيفضل برده الفساد القضيه مش عند أو يانا اقنعك برأيي يا تقنعني

هي ممكن التانيه بس لو عندك استعداد للمناقشه أنا بحترم جدا أي رأي بيعبر عن الحريه وأحترم جدا سجناء الراي حتي لو رأيهم مختلف مع رأيي والسياسه اللي بتمناها بس يكفيهم شرف التعبير بدون خوف والتاثير لدرجة انهم اتسجنوا وأحارب معاهم لحد ما يخرجوا وبعدها نختلف في الرأي لكن نتفق في الهدف اللي قولته

أنا مش متعصبه لرأي بس المفروض انك تسمعني ومتكلمنيش بأسلوب استفزازي يخليني اتعصب الحكايه كلها اني رافضه شعار الاخوان المسلمين ورافضه كمان الرمز هتسألني ليه هأقولك وجهة نظري اللي مقتنعه بيها وكمان واخداها من ديني العظيم

أنا مسلمه بس عايشه في عالم فيه مسيحين وديانات تانيه لما بتعامل مع البشر مش لازم اعرف ديانته ايه يعني مثلا ممكن اتعرف علي حد ويبقي ذوق جدا معايا وبعد كده اكتشف أنه مسيحي هل ده معناه اني اسيبه ومكلموش تاني

ممكن تلاقي فريق كوره ناس مسلمه وحارس المرمي مسيحي بيحمي الفريق كله من الهزيمه أو حارس المرمي مسلم والمدرب مسيحي لازم يغلب عشان المدرب يبقي راضي عنه وفي عيادة الدكتور ممكن الاقي دكتور مسيحي وبيداوي جراح ناس مسلمه او دكتور مسلم وبيروحله ناس مسيحيه فريق مسرحي واللي فيه مسلمين ومسيحين بيعملوا حاجه واحده عشان تطلع في النهايه حاجه جامده تشرف الفريق كله وأعضاؤه احنا امه واحده وايدينا مش لازم تبقي سايبه لا لازم تبقي ايد واحده لما اترفع الشعار بتاع الاخوان الاسلام هو الحل علي عيني وراسي بس المسيحي اللي في البلد هيدور له علي بلد تانيه عمرك شفت مسيحي جرح مشاعرك ورفع الصليب وقالك المسيحيه هي الحل محصلش ومش هيحصل ليه نتعامل بالطريقه دي ليه ما نتعملش بان الدين لله والوطن للجميع ولو تطلب حزب يقوم علي اساس ديني يبقي همه كمان من حقهم حزب يقوم علي اساس دينهم

المفروض ان اي حد يحاول يعمل صراع المفروض احنا نقفله وبرده بالمنطق والعقل مش بالسيف اللي جنب المصحف زمن الكفار انتهي لكن اللي باقي الصراع الفكري مش القوه وصدقني العقل اكبر بكتير من القوه الا في حالات وطبعا احنا عارفينها اللي هي اغتصاب الارض وده طبعا لازم قوه مع الحق

حاجات كتير شفتها بعيني في الانتخابات الاخيره لمجلس السعب وقولت معقول دول بيطبقوا الاسلام وماشين عليه ازاي وانت بتلغي عقل الناس وتقوله لو ما نتخبتنيش هتروح النار أو توقفهم وتضللهم عن اماكن الصناديق او تحط ايدك في جيبك وتطلع عشرين جنيه هو ده الاسلام ووالله العظيم ده حصل

لو بجد عاوز تطبق الاسلام خلاص طبقه متفرضوش بالقوه علي غيرك انصحني بس ما تستخدمش معايا القوه لان الدين ارقي من كده بكتير واسمي من انه يكون شعار علي معارضه عار انا انفعلت جامد وكتبت الشعر ده اقراه

ياللي واخدين الدين شعار

ورافعين سيوفكم البارده

علي الاسلام انتوا عار

وكمان عار علي المعارضه


عايزينها ولعه وتشعللوها

يكش تولع ده املكم

نفسي كلمه يوم تقولوها

تتحقق واشوف عملكم


ياللي رافعين السلاح

في وشنا مشبنخاف

افكركم باللي راح

ومين فينا اللي كان خواف

لوقلنا لا تقولوا كفرتم

وتقيموا علينا حد الله

حد الله بينا وبينكم

اللي ادانا حق الحياه

الدين لله والوطن لينا

مسلم ومسيحي اخوات فيه

وهتتشبك دايما ايدينا

ده اللي رسولنا وصانا بيه

بس ندمت لاني كنت منفعله جدا ازاي اكتب حاجه زي دي المفروض اننا نتقبل الراي الاخر بس مسلمش ليه لو معجبنيش انقده بأسلوب حضاري

وفي النهايه اعتذر لنفسي اولا واخرا لانني جعلتها تخرج عن شعورها وتتلفظ بأشياء لا يجب عليها ابدا ان تخرجها لانها طوال حياتها لم تخطئ في احد ولن اجعلها تخطئ مهما حدث فهي ببساطه تحب كل البشر بديانتهم المختلفه الا الصهيونيه لاني قبل ان اكون مصريه فأنا عربيه ودولتي وأرضي فلسطين

هي دعوه للتعامل مع كل البشر برحمه حتي نحيا من جديد في سلام السلام والامان الذي افتقدناه

المواطنه / رانيا

وظائف خاليه

اعلان

وظائف خاليه

مطلوب شباب كتير للعمل

في مشروع اسمه البطاله

وعشان شبابنا ميحسش بالملل

ولايبقي علي حد عواله

المشروع فاتح علطول

يعني الشاب اكيد شغال

مش هيلاقيه يوم مقفول

دي وظيفه ولا في الخيال

وعلي الفلوس متسألنيش

مش هتدفع فيه كتير

شاي وقهوه والبئشيش

اصل الدنيا لسه بخير

يلا بلغ كل الحته

خلاص ياعم هتبقي موظف

ومتمشيش مع اي حته

من النهارده خلاص استنضف

وفي الاخر علي العموم

حابين نشيل من همك

دا الحزن عمره ما بيدوم

خلاص ياعم معدش يهمك

رانيا ولاعزاء للعاطلين

وظائف خاليه

يبقي انت اكيد في مصر 1

من غير فلسفه وتعقيد وكلام مش بيفيد أي بلد ليها مميزات او بالمعني الأدق ملامح يعني مثلا برج ايفل في فرنسا والسور العظيم في الصين وطبعا الاهرامات في مصر لكن الناس دلوقتي معدتش تفرق معاها الاماكن السياحيه لان في حاجات كتير غطت علي المعالم دي لو سالت سائح عن مصر وقولتله تعرف مصر هيكون رده طبعا الاهرامات والمعابد والمتاحف واحلي حاجه هناك الناس البسيطه والطيبه اللي بنتعامل معاهم ده رايه وهو حر فيه لكن لوسالت الناس البسيطه والغلبانه اللي هو بيتكلم عنها تفتكر يعرفوا ايه عن مصر أكيد نظرتهم هتختلف لان مصر في عيونهم مش بلد سياحي وبس لان غالبيتهم مبيزوروش المناطق السياحيه دي مش عشان حق التذكرة أو مشاغلهم او الوقت اللي همه بيدوروا عليه ومش لاقينه لا الناس دي ابسط من كده بكتير يوم ما بتفكر تخرج بتختار مكان فيه شوية أشجار ونجيله وتجيب اكلها معاها ويبقوا لمه حتي لو كان المكان ده قصاد بيتهم بيحسوا انهم سافروا اخر الدنيا انا مش بكلم عن كل الناس لكن الغالبيه العظمي ,
فيه حاجات كتير اول ماتشوفها لازم تتاكد انك في مصر زي المقاهي اللي دلوقتي تقريبا هي المكان المفضل لمعظم الناس وخصوصا الشباب ولما تلاقيهم عمالين يكلموا في السياسه وتقريبا كلهم بيدعوا أنهم فاهمين كويس في السياسه ولو عارضت حد منهم تبقي أنت انسان مش بتفهم حاجه لان العيب الطاغي فينا دلوقت هو العبقريه الزياده يعني كل الشعب بيفهم لدرجة ان مفيش حد بيتعلم كله معلم
مش هنقول ان فيه تلوث بأشكاله المختلفة بس هنركز علي الدخان اللي بيطلع من مخلفات الارز واللي الفلاح بيحرقها تحت رعاية الجهات المختصه بمنع الحرق في الاراضي ومحاولة استخدام المخلفات كسماد للأرض لكن ببساطه ممكن الموظف ياخد عشره جنيه والموضوع يخلص ولا يبقي فيه محضر ولا حاجه واهي الناس في الريف كأنها شربت سيجارتين مش هتفرق كتير ومش هتأثر وتأكد انك لو دخلت قريه دلوقتي في الريف المصري وملقتش دخان يبقي أنت في بلد تاني مش في مصر
لو جربت تركب ميكروباص ولقيت انسان هو حاسس انه فوق البشر شويه يعني عاوز يعمل حاجه يبين فيها انه مهم ,بعد ماجمعنا الاجره التباع بيديله الباقي ده الطبيعي اللي مش طبيعي انه يصرخ في وش التباع ويقوله انت بتبصلي كده ليه بصراحه احنا مشفناش هو بصله ازاي بس اللي حصل ان كل العربيه باست ايد الراجل علشان يسيب السواق يكمل لحد ما نوصل وبعد ما وصلنا كان لازم الناس تاخد موقف والموقف ده هو معاقبة الراجل اللي همه باسوا ايده في العربيه
لما تلاقي طوابير كتير لازم تتاكد انك في مصر وفي أول الطابور تلاقي الموظف عمال يصرخ ويقول نظام هو أحنا ايه اللي جبنا ورا غير الهمجيه الطابور مش بيتحرك ليه عشان في ناس بتدخل من الباب ناس طبعا مينفعش تقف في الطابور ولما واحد من اللي واقفين يحس ان دي اهانه له نبتدي نسمع صوته هو احنا عشان ملناش ضهر نقف طول النهار ونيجي تاني يوم وفي ناس مبتجيش اصلا ومصالحها تخلص دي بداية الخناقه الكبيرة اللي هتحصل بين الموظف والمواطن وطبعا لازم عامة الشعب يتدخلوا والغلط في الاخر هيجي علي المواطن الغلبان لانه عطل عمل الموظف وصدقني نفس الطابور هيجي تاني يوم وتالت يوم لحد ماتنقضي مصالح الناس

اللي مبتقفش في طوابير

رانيا الجبالي

المتمردة

قبل ان تمضي وتتركني في هذا العالم المظلم بمفردي أخبرني كيف سأحيا وأنت من علمني معني الحياه



أرفض ان اكون مقيدة بالاغلال
أسيرة للحزن ابكي علي الاطلال
أرفض ان ياسرني الجرح والدمع
ويملأ جسدي الحزن وأصبح بلا أمال
أنا فتاه ارفض أن يمتلكني الخجل
ولا أملك سوي الهوي وأفتقد الجمال
أحببته وبوحت له بمشاعري وناديت
حبيبي أحبك ولم أعد اطيق الاحتمال
فوجدته يناديني أرحلي فأنا لغيرك
اما أنت فاحساسي بحبك محال
سمعت ندائه لم ابكي ولكن أصبحت
كشئ حملته الرياح وألقت به من فوق الجبال
أصبحت كالجسد الهامد فيه نبض
ولكن لايسمع الناس منه سوي ملامح سؤال
من انا في عينيه طفله لم يكتمل عقلها
ام فتاه ولكن تحيا في عالم الخيال
لقد فقدت الحب وفقدت كرامتي
وسئمت الحياة ولا أرغب في الانحلال
يسكن في قلبي الجرح ومازلت
أرفض الحزن والبكاء علي الأطلال
كيف أرفضهم وهم أنا ساظل
هكذا متمرده ولن يداويني الا حياة الترحال



المتمردة

رانيا الجبالي