احساسي

ساعات بسأل نفسي ايه اكتر حاجه حلوه في الدنيا دي وفي كل الاوقات مش بلاقي اجابه مش عارفه بئه لان الحاجات الحلوه كتير وتحير ولا لان مفيش حاجه حلوه في حياتي اليوم بعيشه بيومه بفكر في المستقبل زي كل الناس بس نفسي أعيش الحاضر في عالم نقي عالم بني ادمين انا بحلم كده اني أمشي في الشارع الاقي مفيش خناقات ولا صوت عالي ولا واحد بيضرب مراته وولاده ولا طفل واقف بيشحت والناس بتتفرج عليه
أنا افتكر زمان ايام ما كان فيه اريل قبل ما وصلة الدش والكلام ده يكون موجود طلعت مره فوق السطح لقيت عصفورين جمال اوي عاملين عش في الاريل كان بيدفيهم مرضتش اشيله لاني مبحبش اهدم حاجه حد عاملها حتي لو عصفورين صغيرين فضلت قاعده طلع بابا بحتة حديده وراح مطير العش طاروا مش عارفه زعلت علي العش ولا علي العصفورين لانهم رجعوا تاني في نفس الاريال يعملوا عش ويدوب جابوا اشايه الهوا طيرها كان نفسي اجبلهم العش واحطه لان يومها الجو كان برد اوي المهم فضلت قاعده تزلت عشان اتغدي لقيت ماما فتحت قصة واحده جوزها مغلبها معاها واخوه عاوز يشتري البيت ويطرد ولاد اخوه بره بمراته وجوزها اصلا مش مهتم بيهم وكل اللي يهمه السجاير والبانجو وبس افتكرت العصفورين اللي العش طار منهم وبدأوا يعملوا غيره المهم انه لازم يطير سواء نطيره بايدينا او يطير لوحده ده هم يبكي اللي يضحك ان ولاد الراجل ده مش لاقين ياكلوا فالولد الصغير طلع فوق السطح عشان يجيب بيض من عند الفراخ جدته شافته فخضته البيض اتكسر والاكل اللي كانوا هياكلوه ضاع
في بيت واحد ممكن تلاقي شقه بياكلوا لحمه وشقه مش بيلاقوا العيش الحاف فيه ناس يكلوا تلت طاقات وناس مش لاقيه طقه واحده
اللي يزعلك ان كل حاجه حواليك غلط او انت اللي ماشي غلط تعمل خير ويترد لك شر مش مهم المهم انك تعمل خير ولان البيت عندنا مفيش بيوت حواليه بحمد ربنا اني مش عايشه جوه البلد علشان ما اختلطش بالناس او الواقع لانه صعب اوي صفحات الحوادث كل يوم بتزيد كل يوم بنسمع عن مليون حادثة اغتصاب عن واحد قتل مراته او امه طب ليهليه منعش وغيرنا يعيش معانا ليه منخدش الاطفال اللي في الشوارع ونربيهم في بيوتنا ليه منحاوطهمش بحنانا
عارفين ايه اللي بيقلل الرحمه في قلوبنا ايه ان احنا بعد ما كل حاجه بسيطه بدأنا نعقدها مثال صغير وهو تشبيهي لو حد من الريف وكان بيخبز اسألي مامتك كده كانوا بيبططوا الرغيف بايديهم ومفيش حاجه اسمه بطاطه دلوقتي قيه بطاطه بتفرد العيش كانوا معظم الناس بيخبزوا في الفرن البلدي دلوقتي تقولك اشيل حطب واش طلع بعده الفرن الغاز وبعده بقه في كل بلد مخبز او اتنين الناس بطلت تطحن وتخبز وبقوا بيقفوا طوابير علي العيش وما ادراك ما طابور العيش من شتيمه وختاقات قولولي لما بتسمعوا نشرة اخبار ودانكوا ما اتعودتش علي خبر استشهاد فلسطيني او اتنين او تلاته او انفجار في العراق بقينا متعودين علي كده عشان كده احساسنا مات حاجات كتير بتحصل واحنا مش حاسين لحد ما هيجي يوم هنبقي فيه مش بني ادمين عاوز تحس بالناس انزل تحت كوبري انزل محطة القطر في طنطا او مصر
امشي في وسط الناس ودقق في ملامحهم انزل ميدان التحرير وشوف نوعيات الناس اللي فيه السياح والناس الهاي وكمان ممكن تلاقي واحده قاعده في ركن وبتقولك والنبي اجيب غداي النهارده او طفل هدومه مقطعه وقدامه طفل مبيتكلمش الا لغات
حاجت كتير اوي بضايق منها بس اللي بيضايقني اكتر اني مش بأقدر أعمل حاجه كل اللي بقدر اعمله اني متغيرش حتي لو كل الناس اللي حواليه اتغيرت بحلم بجد اني اقابل حد يفهمني ويفهم العالم الي نفسي اعيش فيه أنا منكرش انا ساعات بحب بس قمة ساعدتي اني الاقي الشخص ده مبسوط مع الانسانه اللي هو مرتبط بيها لان مفهوم الحب عندي برده مختلف مع معظم الناس اللي حواليه
مشاعرنا مش بايدينا ومش من حقي احرمها انها تميل لحد لكن زي ما بحترم مشاعري وميولها كمان احترم مشاعر الشخص اللي انا بحبه واحب سعادته
من الاخر كل اللي بحلم بيه في العالم اللي احنا عايشين فيه ده هو الامان بس للاسف مع انه حلم بسيط عمره ما هيتحقق الا اذا سبت العالم ده ورحت لعالم الموتي بيتهيألي هناك هلاقي الامان ومفيش أموات بتحارب بعضها عشان حاجه كلهم ميتين في سلام