تحب تقول ايه للحكومه

هو موضوع اتنشر قبل كده علي موقع حريتنا الفكره جت لما كنت راكبه في ميكروباص ولقيت واحد عمال يقول الحكومه والحكومه فتخيلت انه ناس كتير نفسها تقول حاجات كتير للحكومه تفتكروا قالوا ايه

خد بالك ان دي فرصه مش هتتكرر تاني ده حوار بينك وبين الحكومه قولهاكل حاجه بصراحه عاوز ايه منها ؟ شايف ان فيه حاجه غلط بتحصل في البلد؟ يعني فرحان ولا حاسس ولا حاسس انك مخنوق حاسس ان البلد بتتطوريعني في تقدم ولا تحب حاجه تانيه تحصل في البلد وقبل ما أقول الناس قالت ايه عاوزه اوضح ان ان في ناس لما سألناها متكلمتش خالص مش عارفه المفاجأه ولا ايه بالظبط وفي حد قال "انا مش هأقول حاجه لأني مخاصمها "بس بصراحه هو مقلش سبب الخصام ايه كنا عملنا قاعدة رجاله وفي حد تاني قال "انا عايز سلامتها " طبعا احنا بنشاركه الرأي كلنا عايزين سلامتها أحمد بابتسامه تميل الي السخريه "اقولها اني عايز اتجوز وعاطل مش لاقي شغل ده طبعا نظرا لفرص العمل الكتير اللي هي موفراها والشقق اللي ملت البلد واللي الناس من كترها قربت تخرج للشارع الحاجه سعديه " هي فين الحكومه دي التجار عمالين يغلوا الاسعار والحكومه بقالها سنين بتوعد بالحد منها ومفيش حاجه بتحصل لا ده كل سنه اغلي من اللي قبلها يعني انا بقالي 60 سنه عايشه وعمري ماسمعت عن حاجه بتغلي وترجع ترخص تاني وكمان رغيف العيش مش لاقينه وبرده سمعنا وعود عن تزويد الحصه في البلد ولا حياة لمن تنادي أمجد " لا بجد أحب أقولها الله يكون في عونك ويقدرك علي المشاكل الكتير اللي بتواجهك وبتمني حل لمشكلة البطاله في القريب العاجل لاني شايف ان من اسباب الانحراف في البلد البطاله ياسر " لا أنا محبش أقول حاجه لان بجد لو مفيش حكومه في البلد مش هيحصل تغير لان دلوقتي في حكومه واللي عاوز يعمل حاجه بيعملها وبنسمع وعود وبس بصراحه احنا فقدنا مصداقيتها ندي " ياريت بجد يلاقوا حل لمشكلة المواصلات لان ساعات بقف بالساعات ومش بلاقي مواصلات وبعدين الاجره زادت اوي وياريت اسمع قريب عن حل لمشكلة رغيف العيش عشان اقضي يومي في حاجه مفيده غير طابور مجدي " أحب أقولها كفايه لحد كده وياريت تتشكل حكومه تانيه جديده واول حاجه تعملها الحكومه الجديده تصرفلنا علاوه ولا مكافئه علي تحملنا الحكومه القديمه مرسي " طفل من اطفال الشوارع " لا انا مفيش كلام بيني وبينها لاني مبتأثرش اوي بأي قرارات لان عمرها ما قالت ان احنا نرجع بيوتنا غصب عنا ولا طردونا من الشارع هو صحيح ساعات بيتقبض علينا بس بنرجع تاني للشارع وانا تابع لحكومة الشارع ومن الردود الغريبه قالنا عم صلاح " انا الحكومه بتاعتي مراتي معرفش حكومه غيرها لكن لو تقصد حكومة البلد فانا راجل في حالي بحب اي حاجه تعملها الحكومه فينا اقصد تعملها لنا الحكومه وقال احد الاشخاص " محبش اقول حاجه لحد معرفوش
راضي " اقولها اموت واشوف مقلب الزباله اللي قدامنا مش موجود " يظهر ان عمره طويل اوي هشام اداري " احب اقولهم ان حرام ان المدرسين ياخدوا كادر واحنا منخدش حاجه خالص ده ميرضيش ربنا واقصر رساله قالتها أم محمد "احب اعيش في امان هي لخصت كل الرسايل اللي كل الناس تحب تقولها للحكومه لان حلم الناس بجد انها تعيش في امان

وانا اول حد بحلم اعيش في امان
رانيا الجبالي